Julehiet blir til
Sist jul hadde eg ein idé om å lage eit “julehi” av pepperkaker, ein slags titteboks eller diorama. Det blei med tanken, men i år ville eg prøve det igjen. No med litt andre materialar. Eg ville få det til å sjå ut som eit lunt og julepynta hi i skogen, der det kanskje budde ein liten alv eller ei skogmus..
Eg begynte med ei pappøskje og kledde inn veggane med drivved, mose, kongleskjell og strie.
Så måtte det til litt møblering. Ein gyngestol med skammel blei lagd av drivved, pinnar og skinn. Eit lite bord av furuskjell og ein bitteliten oljelampe av perler. Stearinlys av q-tips og ei perle. Juletreet blei lagd av ein vintergrønn hagebusk. Julepynt av perler, farga papir og pepperkaker.
For å lage bittesmå pepperkakehjerter, lagde eg ei form av ein telyskopp.
Pipa blei lagd av sugerør og ein plastdings (kork?) som eg malte med svart hobbymaling.
Så var det klart til å innreie. Det blei også eit veggur og ei peishylle. Golvet fekk teppe av ein pynteduk.
Neste steg: Ein tur ut i skogen for å finne ein bra hiplass. Innunder ei gran med store røter såg det lunt og fint ut.
Siste steg: Litt trylling i photoshop.. 🌟
Eg trur kanskje eg blir her til våren kjem.. ☺️
